من الخنساء بت المك

خبر الشوم طلق عمّ البلد وارجـاها

فجّع لقلوبنا وشلخها ورجــــــــاها

دارت الفرح غيم الــــــــــــحزن فجاها

رقد البفرح العامة ويلبي رجـــــــــاها




رحل كروان بــــــلدنا الغنا لي استقلالا

اصلو الفرحة مابتدوم عــــــــلينا مٌحالا

ادي رسالتو والبلد الحــــــــبيب غنالا
عليو افريقا حزنانة وبــــــكت بي حالا





السودان عموم حزنان وحالتو كئيبة

رحل الليلة دمـــــّال الجروح و طبيبة

سكت البلبل الصداح وجـــاتنا مصيبة
حفظ الفن حديث وقديم تراث وحقيبة





شوارع العاصمة ياوردي السمح ترصيفا

بقت الليلة بي فقدك خراب و مخيفة

قلوب عشاقك اليوم شن بقيفو نزيفا ؟؟
فقدت ضلها ونيلا وخــــــــضار وخريفا





حليل الضوا ساحـــــــتنا ونريدو حقيقة

حليل الفات رحل وجروحنا سابا طبيقة

حليلو البفرح الامة ويـــــــــضوي طريقة
فات الليلة نــــايحة الناس ويبسان ريقة





حليل مـــــــرسالو ياخلاي وقمرو البوبة

واجمل صدفة واحلامو القبيل بحكـــوبة

رقد البلبل ال افــــــــريقا بيهو طـــروبة
صوتو رخيم ونطقو سليم وفيهو عذوبة





وآآآآآآآه من فقدو العرا الفنون وآدابا

خلي قلوبنا من جانا الخبر وهـــدابا

الخلى القلوب منتكسة فيها كـــــــآبه
صورة وردي قدامنا الخلوق حادابا





وين الليلة وردي وينهو حتى غناهو

وين العزة سودانا ورفع مـــــغناهو

البي موتو لكنا المر كتييير ضقناهو
مابكفينا نم الكون اكان ســـــقناهو





وآحزن البلد وياحـــــــليهن الرايدنك

يوم شافنا الاذاعات والصحف ناعينك

ليه فارقت وواخيبتا جت راجـــــــنك ؟؟
وعارفين الرحول مكتوب وحق مامنك





ولي اكتوبر الاخـــضر سمعنا نداك

بي الاحسان تقابل كل من عاداك

لو بفدوك من الموت جزم بفداك
بدلك امرض آوردي وامش مثواك





انــــــــهدّت ركايز الفن واصبح مايل

وعشاقك وراك ياوردي سوو عمايل

يالناضلت شان بلدك واعز شــمايل
خليت الرجال غبو وحريمنا رمــــايل





ربنا يرحمك يغفر زنوبك ضـــــمة

بدعوات حبابيك ومعشرك والامة

يالفارقت خلفت النزيف والحمة
بعدك يومنا ليل وحياتنا علة وغمة




19\2\2012م