لعبيديه كان درت الحقايق واضحه
ناس في الحاره ايديهم مدربه فالحه
نحن الميرفاب يا خينا شوفلك صالحه
خابرانا المعارك واللايام الكالحه

نحن شيوخنا ناس كدباس علوم ودرايه
ونحن نعلي للدين والتراب الرايه
قول للجابلو فوق اهلي البكاتلو فرايه
نحن ملوك اكابر والملوك بي رايه

اهلي البنصرو العازه ويلولو جناها
واهلي البهدمو الفتنه ويدكو بناها
اهلي الخاصمن قلل مقامو اتناها
واهلي عيال جعل مثني وثلاث قلناها

مافينا الفقد اخلاقو خاب انحطه
مافينا الرقد يوم الكتال اتغته
نحن ولاد جعل فوق ام لهيب نتمطه
نحن الميرفاب للفرسه دار ومحطه

بلدي العن معاكسة الرزق مطرية
بلدي زراعة بالبابور وبالمطرية
بلدي وطاتو بالدهب البلالي ترية
بلدي تجارة من الشاشة للكورية

مرحب بالضيوف كلمتنا ديمه قويه
كفايين يمين كان جيتو بالكميه
الداير الرزق بلقي القبيل محريه
والداير الرجال خوتنا ميه الميه

اهلي البكرمو الضيفان ونارهم حيه
منو الما جاها .. بقيناها دار تكيه ؟؟
الاغراب كتار من حلفا لي ناس تيه
بوليسنا المساجد و حكمنا الجوديه


نحن ورثنا من ابواتنا قولة لا لا
لي اجعص جعيص ما بنقلوها قوالا
نحن نفوسنا في الفزعان ولا بنرتالا
ساهله نبيعه للاخوان ونوهب مالا

نحن وضعنا ساده وفي الارض حساس
جدودنا مكوك ومعروف العرق دساس
نحن العندو نيه يمس بلدنا مساس
بنكرمو تب نطيب خاطرو بالرصاص